Gärn möcht ig euch überne Person verzelle, wo im Stärnzeiche vor Waag gebore isch.
A Waag isch öpis wo sich im Glichgwicht hautet, wi z'Jahr oh. So isch si im Summer wie im Winter immer aktiv am Sport triebe. Sigs bim Schifahre, Borde oder Telemärkle. So träffe mir si o bim Jogge, Beachvolley, oder Bäike a, u meischtens steit si z'oberscht ufem Stockerl, wenns drum geit, wär di schneuschti isch gsi. Jetz heit dir sicher scho gmerkt, dass es sich hie umene sehr aktivi Frou handlet.

O wenn d'Delfine ihri lieblings Tier si, isch sie nid unbedingt e Wasserratte. Sie cha sich oh gut am Strand mit läse u schlafe vertörle. U schlafe cha si gut, sehr gut!

Es cha nämlich im JO-Skilager di ganz Nacht räble u lärme. Sie ghört bis am andere Morge nüt, u de isch si geng noh z'letscht bim Zmorgetisch!

So, jetz weisch sicher oh Du, Monika dass vo Dir d'Red isch. D'Monika isch aus JO-Leiter über meh aus es Jahrzähnt nid wäg zdänke gsi. Nid nume adminischtrativ, hesch Du aues Tip Top gmacht. O der neu Job aus J&S Coutsch u so der JO Chef hesch ohni lang z'murre übernoh.

O ufem Schnee hesch Du üs mängisch zeigt wär di schneuschte Latte het, u de JO-Ier bisch geng mit Rat u Tat u super Tips zur Site gstande. Nid öppe will Du das so i de J&S Kürs glehrt hesch, sondern Du heschs us eigeter Erfahrig miterläbt.
D'Monika oder Mönlein isch mit vieri scho uf de Latte gstande. I Ihrne Eutere het sie gueti ungerstützig u Trainer gha.

Chum het sie die erschte Böge chöne mache het me doch id JO welle ga. Für so "chlini" (1. Klasse) isch das den nume ihr JO Schwande müglech gsi. Z'Sigriswil het me drum scho säuber müesse brämse u schöni Bögli fahre!!
Dr JO u em Skiclub Schwande isch sie bis zum Schuländi tröi blibe. Bir erschte Teilnahm amene OVO Grand-Prix 1980 hets Möne grad weue wüsse, u isch z' Schönried aus Sieger ufem Podescht gstande. Uf das ache het si du mit dr Zeller Heidle u Frutiger Heinz nach Wildhus a Schwiizerisch OVO Grand-Prix chönne.
Zerschte mau ohni d'ungerstüzig vo Vatter u Muetter het d'Monika müesse starte.

Sicher isch däm Tag e schlafiosi Nacht vorus gange. "Chani äch de starte, geit das Törli de o uf?"
E so si vieli witeri erfolgriechi Renne i ihrer Kariere zöme cho. Die viele Medaille u Pokäu ir Stube vo Vreni u Ruedi zeiges dütlech.
Wo d'Monika ir B. Klass isch gsie het sie sich übere BOSV chönne für d' JO Schwizermeschter-schafte qualifiziere.
U im Winter 1985/86 isch sie zweiti im BOSV JO Cup gsie.
Wärend dr Stifti hesch du die de müesse entscheide, witer schine oder o lieber einisch die Freizyt mit Fründinne z'gniesse.

Schine isch ar Monika ihres Läbe. No hüt beschtritet sie ab u zue es Renne. Bi de Startvorbereitige isch immer höchschti Konzentration ahgseit. O so bi de Eidgenösische Turnerskitage z'Andermatt im Jenner 2000 u es het sech glont. Hei mir di doch aus Siegerin dörfe fiire.
Ja u gfiiret hei mir du. Wo der Nöbu fisch übere Oberaup ! cho, si mer du im Börghus Nötsche !ikehrt. Zwötschgelutz hei mir du brucht zum werme bevor me d'Abfahrt uber Passstrass i agriff he gno!!! Het's eich denn agfange mit dere Sucht???
E uberus sportlicht u angaschierti Frou verlaht jetzt der Vorstand vom Skiclub Sigriswil. Doch uf ihri Hilf darfme wiiter hoffe, ganz chasi d'JO nid la sii.

I chönt no viu verzeue vor Monika, doch jetzt wei mer nüme lenger wärde.

Dr Vorstand schlaht euch vor, d' Monika für ihri grosse Verdienscht ihr JO u aus Dank mit dr'Ehremitglieschaft z'beehre.

Sigriswil, 29. Oktober 2004
Dr Presi